JULAI 15, 2021; ALHAMISI: JUMA LA 15 LA MWAKA

Mt. Bonaventura, Askofu na Mwalimu wa Kanisa
Kumbukumbu
Kijani
Zaburi: Juma 1

SOMO 1: Kut 3:13-20
Musa alimwambia Mungu, Tazama, nitakapofika kwa wana wa Israeli, na kuwaambia, Mungu wa baba zenu amenituma kwenu; nao wakaniuliza, jina lake ni nani? Niwaambie nini? Mungu akamwambia Musa, Mimi niko ambaye niko; akasema, Ndivyo utakavyowaambia wana wa Israeli; Mimi niko amenituma kwenu.
Tena Mungu akamwambia Musa, waambie wana wa Israeli maneno haya, Bwana Mungu wa baba zenu, Mungu wa Ibrahimu, Mungu wa Isaka, Mungu wa Yakobo, amenituma kwenu; hili ndilo jina langu hata milele, nalo ni kumbukumbu langu hata vizazi vyote.
Enenda, ukawakusanye wazee wa Israeli pamoja, ukawaambie, Bwana Mungu wa baba zenu, Mungu wa Ibrahimu, Mungu wa Isaka, Mungu wa Yakobo, amenitokea, akaniambia, Hakika nimewajilieni, tena nimeyaona mnayotendewa huko Misri; nami nimesema, nitawapandisha kutoka katika mateso ya Misri na kuwaingiza katika nchi ya Mkanaani, na Mhiti, na Mwamori, na Mperizi, na Mhivi na Myebusi, nchi ijaayo maziwa na asali. Nao watakusikia sauti yako; nawe utakwenda, wewe na wazee wa Israeli kwa mfalme wa Misri, na kumwambia, Bwana Mungu wa Waebrania, amekutana nasi; basi sasa twakuomba, tupe ruhusa twende mwendo wa siku tatu jangwani, ili tumtolee dhabihu Bwana, Mungu wetu. Nami najua ya kuwa huyo mfalme wa Misri hatawapa ruhusa mwende zenu, la, hata kwa mkono wa nguvu. Nami nitaunyosha mkono wangu, na kuipiga Misri kwa ajabu zangu zote, nitakazofanya kati yake, kisha baadaye atawapa ruhusa kwenda.

WIMBO WA KATIKATI: Zab. 105:1, 5, 8-9, 24-27

  1. Aleluya.
    Mshukuruni Bwana, liitieni jina lake,
    Wajulishen watu matendo yake.
    Zikumbukeni ajabu zake alizozifanya,
    Miujiza yake na hukumu za kinywa chake
    (K) Bwana analikumbuka agano lake milele.
  2. Analikumbuka agano lake milele;
    Neno lile aliloviamuru vizazi elfu.
    Agano alilofanya na Ibrahimu,
    Na uapo wake kwa Isaka. (K)
  3. Akawajalia watu wake wazae sana,
    Akawafanya kuwa hodari kuliko watesi wao.
    Akawageuza moyo wawachukie watu wake,
    Wakawatendea hila watumishi wake. (K)
  4. Akamtuma Musa, mtumishi wake,
    Na Haruni ambaye amemchagua.
    Akaweka mambo ya ishara zake kati yao,
    Na miujiza katika nchi ya Hamu. (K)

INJILI: Mt 11:28-30
Yesu aliwaambia makutano: Njoni kwangu, ninyi nyote msumbukao na wenye kulemewa na mizigo, nami nitawapumzisha. Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu; kwa maana nira yangu ni laini, na mzigo wangu ni mwepesi.

TAFAKARI:
YESU NI MFARIJI: Injili leo inatufundisha kuwa Yesu ni mfariji pekee wa wote wenye shida. Yesu anatoa mwaliko kwa wote wenye kulemewa na mizigo na kusumbuka kumwendea yeye ili awatue mizigo na kuwapa pumziko. Tumeelemewa na mizigo mizito ya dhambi, kuitua ni kuachana na dhambi kabisa na kujitia nira ya Kristo. Nira ya Kristo ni maisha ya imani thabiti na maisha adili ya Kikristo. Tunasongwa pia na matatizo mbalimbali, tunachanganyikiwa tunapokosa jibu la matatizo hayo. Leo tunaalikwa kumwendea Yesu mfariji wetu na kumweleza shida zetu naye atatusaidia. Tuache kutangatanga kutafuta waganga wapiga ramli na wafanyao maombi hewa. Tumkimbilie Kristo aliye nguvu na wokovu wetu kwa njia ya sala na kufuata njia yake yaani imani hai na matendo yenye kuisadifu imani yetu.

SALA: Tunaelemewa na mizigo mingi ee Yesu tujalie tuamini kuwa kwako tunapata pumziko la kweli.