JUNI 7, 2020; JUMAPILI: JUMAPILI YA 10 YA MWAKA

UTATU MTAKATIFU
Sherehe
Nyeupe
Zaburi: Tazama sala ya siku

SOMO 1: Kut. 34:4b-6, 8-9

Musa aliinuka asubuhi na mapema, naye akakwea katika mlima wa Sinai, kama Bwana alivyomwamuru, akazichukua hizo mbao mbili za mawe mkononi mwake. Bwana akashuka ndani ya lile wingu, akasimama pamoja naye huko, akalitangaza jina la Bwana. Bwana akapita mbele yake, akatangaza, “Bwana, Bwana, Mungu mwingi wa huruma, mwenye fadhili, si mwepesi wa hasira, mwingi wa rehema na kweli; Musa akafanya haraka, akainamisha kichwa chake hata nchi, akasujudu. Akasema, “Ikiwa sasa nimepata neema mbele zako, Bwana, nakuomba, Bwana, uende kati yetu maana ni watu wenye shingo ngumu; ukasamehe uovu wetu na dhambi yetu, ukatutwae tuwe urithi wako.”

WIMBO WA KATIKATI: Dan. 3:52-56

  1. Umehimidiwa, Ee Bwana, Mungu wa baba zetu:
    Wastahili kusifiwa na kutukuzwa milele.
    Limehimidiwa jina lako takatifu, tukufu;
    Wastahili kusifiwa na kutukuzwa milele.

(K) Wastahili kusifiwa na kutukuzwa milele.

  1. Umehimidiwa katika hekalu la fahari yako takatifu;
    Wastahili kusifiwa na kutukuzwa milele.
    Umehimidiwa juu ya kiti cha ufalme wako;
    Wastahili kusifiwa na kutukuzwa milele. (K)
  2. Umehimidiwa utazamaye vilindi, uketiye juu ya makerubi;
    Wastahili kusifiwa na kutukuzwa milele.
    Umehimidiwa katika anga la mbinguni
    Wastahili kusifiwa na kutukuzwa milele. (K)

SOMO 2: 2 Kor. 13: 11-14

Hatimaye, ndugu, kwaherini; mtimilike, mfarijike, nieni mamoja, mkae katika amani; na Mungu wa upendo na amani atakuwa pamoja nanyi. Salimianeni kwa busu takatifu. Watakatifu wote wawasalimu. Neema ya Bwana Yesu Kristo, na pendo la Mungu. Na ushirika wa Roho Mtakatifu ukae nanyi nyote.

SHANGILIO Ufu. 1:8
Aleluya, Aleluya,
Atukuzwe Baba na Mwana na Roho Mtakatifu,
Mungu ambaye yupo, aliyekuwako, na atakayekuja.
Aleluya.

INJILI: Yn. 3:16-18

Yesu alimwambia Nikodemu: Kwa maana jinsi hii Mungu aliupenda ulimwengu, hata akamtoa Mwanawe wa pekee, ili kila mtu amwaminiye asipotee, bali awe na uzima wa milele. Maana Mungu hakumtuma Mwana ulimwenguni ili auhukumu ulimwengu, bali ulimwengu uokolewe katika yeye. Amwaminiye yeye hahukumiwi; asiyeamini amekwisha kuhukumiwa; kwa sababu hakuliamini jina la Mwana pekee wa Mungu.